Dia 5 Outubru 2023, Governu Timor-Leste liu husi Ministériu Agrikultura, Pekuária, Peska no Florestas (MAPPF), iha Diresaun Geral Floresta, Kafé no Plantas Industriais, parseria ho Ministru Turizmu no Ambiente (MTA), Conservation International Timor-Leste (CI-TL) no Administrador Munisipiu Liquica hala'o Serimónia Lansamentu ba Plaka Sinalizasaun Benvindu iha Área Protejida Foho Kutulau, suku Metagou, posto administrativo Bazartete, Munisipiu Liquisa

Objetivu prinsipál atu instala Plaka Sinalizasaun Benvindu nian mak atu hasa'e konsiénsia públiku kona-ba ezisténsia área protesaun sira. Ida ne'e ajuda komunidade lokál no vizitante sira atu komprende katak área ne'e iha valór espesiál iha área ekolojia, kultura no istória.

Durante serimónia ne'e, Sua Exelensia Fernandinho Vieira, Sekretaria Estadu Floresta, ko'alia liu kona-ba papél importante iha área protesaun ba komunidade lokál no governu. “Governu iha kompromisu atu kria kondisaun no fasilidade sira ne'ebé presiza atu hasa'e ekonomia lokál”.